Masobra 3,000 ka mga wanted persons ang naaresto sang Police Regional Office (PRO) 6 sa anom ka bulan nga operasyon. Santo sa data sang PRO-6, halin Pebrero 15 tubtob Agosto 14, 2024, nagdangat sa 3,057 ka mga wanted persons ang naaresto sa Western Visayas sa 2,903 ka mga police operations.
Sa nasambit nga numero, 466 ang gin-categorized nga most wanted persons (MWP) samtang 2,591 naman ang other wanted persons. Sa mga MWP, isa ang national level, 68 ang regional, 97 ang provincial kag city level samtang 300 naman ang station.
Nagapanguna ang Iloilo Police Provincial Office (IPPO) sa may pinakamadamo nga naaresto nga MWP nga nagdangat sa 142. Ginasundan ini sang Negros Occidental Police Provincial Police Office (NOCPPO) nga may 104; Capiz Provincial Police (CPPO) nga may 50; Antique Police Provincial Office (APPO) nga may 44; Bacolod City Police Office (BCPO) nga may 42; Iloilo City Police Office (ICPO) nga may 39 kag Aklan Police Provincial Police Office (APPO) nga may 26. Samtang pareho nga may tig-walo ang Guimaras Police Provincial Office kag Criminal Investigation and Detection Group, Regional Field Unit 6 (CIDG, RFU6). May tatlo naman ka MWP nga naaresto ang Regional Mobile Force Battalion 6 (RMFB6).
Sa bahin naman sang other wanted persons, nagapanguna ang NOCPPO sa may pinakamadamo nga naaresto nga nagadangat sa 1,209. Ginasundan ini sang IPPO nga may 461; ICPO nga may 201; BCPO nga may 198; Antique PPO nga may 160; Capiz PPO nga may 145; Aklan PPO nga may 127; Guimaras PPO nga may 57; RMFB 6 nga may 21 kag 12 naman ang iya sang CIDG, RFU6.
Sa kabug-usan, ang NOCPPO ang may pinakadamo nga naaresto nga wanted persons sa nasambit nga period nga nagadangat sa 1,313 ukon katumbas sang 42.95 percent sang total arrests.
