Isa sa mga ginatudlo karon nga motibo sa pagtiro-patay sa isa ka lalaki sa Sitio Mauboy, Barangay Nabulao kaina sang aga, Agosto 31 amo ang problema sini sa duta ukon land dispute.
Ang biktima ang ginkilala kay Fernando Planas, residente sang Sitio Cayas sa nasambit nga barangay.
Base sa inisyal nga imbestigasyon sang Sipalay PNP, natukiban nga papauli na kun tani sa ila balay ang biktima sakay ang iya motorsiklo sang hinali lang gintiro ini sang wala pa makilal-an nga mga suspetsado sa nagkalain-lain nga parte sang kalawasan sini.
Sa interview sang DYHB kay Nabulao, Punong Barangay, Jobart Eran, ginpahayag sini nga makapila ka beses na nagabalik-balik ang biktima kag pamilya sini sa barangay bangud sa ila pag ilinaway sa duta.
Dugang pa sini nga kapin lima ka mga tawo nga nagasuksok bonnet sakay sa motorsiklo ang una na nasiplatan sang mga pumuluyo sa lugar nga amo naman ang mga posible nagbantay kay Planas kag nagluthang diri.
Igo sa dughan kag sa chura ang biktima nga posible naman gintunaan sang iya gilayon nga kamatayon.
Nagapatigayon sa karon sang hot pursuit operation ang Sipalay PNP agud madakop ang nagpalagyo nga mga suspetsado.
