MADRIDEJOS, CEBU- May person of interest na ang Madridejos Municipal Police Station natuhoy sa natabo nga pagpang-arak luthang sa anom ka mga manugpanagat nga nagresulta sa kamatayon sang isa ka tripulante nga residente sang Victorias City Negros Occidental.
Base sa eksklusibo nga pahayag ni Police Lieutenant Michael John Bañes sa DYHB, Officer In Charge sa amo nga estasyon, padayon ang imbestigasyon sang mga kapulisan natuhoy sa gina-alegar strafing incident nga nagluntad sa tunga lawod, pasado las-5 sang kaagahon, Setyembre 3.
Madumduman nadulaan sang kabuhi si Rex Dela Cruz bangod sa pagpangluthang nga nag-igo sa iya nga dughan.
Samtang kaupod sang biktima sang nagluntad sang insidente amo ang kapitan sang fishing boat nga si John Rexil Azuelo, kag mga tripulante nanday Ronelo Azuelo, Justine Jamante, Joel Vitualla, Alvin Galino.
Una na nga ginpahayag sang kapitan sang fishing boat nga possible bantay dagat ang may kahimuan sa amo nga krimen.
Apang sa nagapadayon nga imbestigasyon sang mga kapulisan, kun mapamatud-an nga ang amo nga perso of interest ang suspetsado sa amo nga insidente, sila nakatalana nga pasakaan sang kaso nga murder kun sino man ang may kahimuan sa amo nga krimen.
Nagpasalig si PLt. Bañes sa pamilya sang biktima nga mahatagan sang hustisya ang kamatayon ni Dela Cruz kag tingwaan nga indi na maliwat matabo ang kaangay nga insidente sa lugar.
