Nagtaliwan na ang lineman sang Negros Power nga nahulog sa poste kag na-comatose.
Sa statement sang Negros Power, las-9 kagab-i, Setyembre 17, 2024, ginbawian sang kabuhi sa Intensive Care Unit (ICU) sang Metro Bacolod Hospital ang lineman nga si Jessie James Torremocha, 34-anyos nga tumandok sang Davao City, kag crew sang Carmel Light Manpower Negros Power, isa ka contractor sang korporasyon.
Madumduman nga si Torremocha ang na-assign sang pagpanghawan sang linya sang kuryente sang nahulog ini sa poste las-3 sang hapon, September 15 sa bahin sang Circumferential Road, Brgy. Villamonte, Bacolod City.
Bangud sa kadamo sang mga kahoy nga nagsablay sa linya sang kuryente nga kabangdanan sang brownouts, ginhingagaw nila ini panghawan, agud ma-restore ang kuryente.
Sandig sa statement sang Negros Power, samtang yara siya sa ibabaw sang puno sang kahoy si Torremocha nga may kataason nga halos 30 feet, nahulog ini siya sang hana niya pa lang nga itakod ang iya harness sa sunod nga sanga.
Nagapalab-ot sang pagpakig-unong sa pamilya kag kaabyanan ni Torremocha ang Negros Power. Ginpasalamatan man sang kompaniya ang nangin serbisyo ni Torremocha.
