Nagfile na sang iya certificate of candidacy (COC) si 4th District Board Member Jose Benito “Joben” Alonso sa pagka-Vice Governor. Kaupod ni Alonso si Incumbent Governor Eugenio Jose “Bong” Lacson nga nagfile man sang iya COC nga liwat nga magpapili bilang Gobernador sang probinsya.
Ginpahayag ni Alonso nga wala man siya maglaum nga magapapili bilang Bise Gobernador apang ginabaton niya ini bangud sa suporta ni Governor Lacson kag sang United Negros Alliance (UNEGA).
Suno kay Alonso, 35 ka tuig na sya sa iya nga pag serbisyo sa publiko kag kun palaron siya sa iya pagpapili magapadayun ini sa iya maayo nga serbisyo para sa probinsya.
Ginpasalig man ni Alonso si Governor Lacson nga indi mag problema kay tinguhaan sini nga mangin smooth ang relasyon kag mangin kaangay sang ila maayo nga pag-updanay ni Vice Governor Jeffrey Ferrer.
Madumduman nga ginbaton ni Alonso ang pag-endorso sa iya ni Vice Governor Ferrer sa idalum sang UNEGA sa ginpatigayon nga general assembly sang Partido tinalikdan nga September 7, 2024.
