Nadugangan sang 15 ang mga aspirants sa pagka-alkalde sa Negros Occidental sa Day 7 sang filing sang certificate of candidacy (COC) kahapon, Oktubre 7, 2024.
Nag-file sang ila COC kahapon ang mga nagatuyo magpare-elect nga sanday San Carlos City Mayor Renato Gustilo, Pulupandan Mayor Miguel Antonio Peña, kag Pontevedra Mayor Jose Maria Alonso.
Nag-file man si former Silay City Mayor Mark Andrew Arthur Golez; Christine Miñada sa Manapla; Napoleon Delfinado Jr. sa San Enrique; Ricardo Presbitero sa Valladolid; kag duha naman sa ciudad sang Bago nga sanday Marina Javellana-Yao kag Joshwa Margallo. Sa banwa sang Binalbagan nag-file man si Emmanuel Aranda kag duha sa La Castellana nga sanday Councilor Ryan Canoy kag Clea Velasco. Nag-file man sa pagka-mayor si Vice Mayor Adrian Villaflor sa Moises Padilla; John Cordero sa Kabankalan City kag Bebsie Villegas sa Sipalay City.
Nahibaluan nga may yara na sang 30 aspirants nga nag-file sang ila COC sa una nga anom ka adlaw sang filing.
Sa mga una nag-file, 10 ang re-electionist nga ginalakipan nanday Silay City Mayor Joedith Gallego, Murcia Mayor Gerry Rojas, Sipalay City Mayor Maria Gina Lizares, Ilog Mayor John Paul Alvarez, Hinoba-an Mayor Daph Anthony Reliquias, Calatrava Mayor Marilyn Era, Escalante City Mayor Beboy Yap, Cadiz City Mayor Salvador Escalante Jr., Moises Padilla Mayor Ella Celestina Yulo kag Candoni Mayor Ray Ruiz.
Anom ang gikan sa First District, tatlo sa Second District, walo sa Third District, duha sa Fourth District, apat sa Fifth District kag pito sa Sixth District.
