Ginpanginwala sang 22-anyos nga babaye nga sila ang may relasyon sang 47-anyos nga suspetsado sa pagmuno sa iya sa Prk. Cabachawan, Barangay Villamonte sa ciudad sang Bacolod, gab-i sang Lunes, Oktubre 14. Ang biktima ang ginkilala nga si Joan Marcillana, kag residente sang amo nga lugar samtang ang suspetsado amo si Gabriel Amar, kasado, isa ka technician kag residente sang Purok Lemon Grass, Brgy. Tangub sa amo nga ciudad.
Base sa pahayag ni Police Captain Francis Depasucat, Station Commander sang Bacolod City Police Station 4, sa inisyal nga impormasyon nga nakuha sang kapulisan, ginpahayag sang biktima nga wala ini sila sang relasyon sang suspetsado, apang sa bahin sang lalaki sila ang may komunikasyon nga duha pinaagi sa text.
Nahibaluan nga may nagluntad nga paglalisay sa tunga sang biktima kag suspetsado, kun sa diin sa pagtalikod ni Marcillana siya gilayon ang ginbuno ni Amar gamit ang kutsilyo sa kilid sang iya nga lawas. Ginalantaw nga pagpangimon ang motibo sa pagpamuno bangod gina-alegar wala ginasapak ni Marcillana si Amar. I
Sa karun yara sa ospital ang biktima para sa nagakaigo nga pagbulong, samtang nahunong naman si Amar sa PS4 para sa nagakaigo nga disposisyon kag magapangatubang sang kaso nga frustrated homicide.
