Gin-isyuhan sang notice of violation ang contractor sang ginatukod nga New Government Center sang Silay City.
Ini matapos natukiban nga wala sang building permit ang proyekto sang contractor nga Silver Dragon Construction and Lumber and Glass Supply.
Ginpahayag ni Silay City Building Officer Engr. Elmer Kent Torres, gin-serve ang notice of violation sadtong Oktubre 18 apang wala nagpirma ang nagbaton sang dokumento.
Suno kay Torres, ginhatagan sang tatlo ka adlaw ang contractor ukon kutob sa Myerkules agud magpasa sang mga rekisitos para sa pagproseso sang building permit sa Office of the Building Official. Samtang, bangud nga nakasugod na ang proyekto apisar wala sang building permit, pabayaron lamang sang multa ang contractor.
Ginpabutyag dugang sang city building officer nga bisan pa proyekto sang gobyerno indi ini exempted sa pagkuha sang building permit. Nahibaluan nga ang Silay City New Government Center, nahamtang sa Hacienda Maquina sa Barangay Rizal, ang balor P500 million.
