Ginpabutyag sang bise alkalde sang Bacolod nga si El Cid Familiarian ang iya bahin angut sa pagpahamtang sang Peryahan sa dalan Lacson sa selebrasyon sang Masskara Festival 2024.
Sa interview sang DYHB kay Familiarian iya ginpahayag nga dapat ekonsiderar sang Bacolod Yuhom Foundation ang pagpahamtang sa insakto nga lugar sang mga kaangay sini nga ginakabig income generating activity.
Madumduman nga nagsumiter sang sulat ang Bacolod Yuhum Foundation sa Sangguniang Panglungsod (SP) nga naga-endorso sa Five Star Mobile Carnival sa pag-operate sang peryahan sa Lacson street sang ciudad.
Suno sa Bise-alkalde personal ini nga indi magpahanugot bangud sentro sang business kag turismo ang dalan Lacson samtang naghatag man ni sang iya suggestion sa pagpahamtang sang kaangay nga peryahan sa reclamation area.
Ginalauman nga mangin parte sang discussion sang SP ang pagpahamtang sang peryahan sa session nga patigayunon bwas nga adlaw, Oktubre 24, 2024.
