Na-deploy na ang mga katapo sang Negros Occidental Police Provincial Office (NOCPPO) sa mga ciudad kag kabanwahanan sang probinsya para sa kahiwatan sang tigkalalag subong nga tuig.
Suno kay NOCCPO Spokesperson nga si Police Captain Wilma Silva nga nagpadulong na si Provincial Director PCOL Rainerio M. De Chavez sa mga patyo sang mga ciudad kag banwa sang probinsya agud personal nga mag-inspection kaupod ang mga hepe tinalikdan nga Oktubre 29, 2024.
Magapahamtang naman sa gihapon sang police assistance desk sa tagsa ka mga patyo para mag-monitor sa lakat sang sitwasyon sa tagsa ka mga lugar.
Hugot naman nga ginadumili-an ang pagdala sang pointed materials, baraha, sound system, makahulubog nga ilimnon kag mga armas-luthang sa pagbisita sa mga patyo.
Magapatigayon naman sang checkpoint sa entrace kag exit sa tagsa ka mga patyo ang mga katapo sang kapulisan.
Padayun naman nga ginahinyo ang mga pumuluyo nga sa gihapon mag kooperarar sa mga pagsulundan agud mangin matawhay kag mangin safe ang pag-bisita sang mga in isa ila mga himata nga nagtaliwan.
