Ginhatagan sang pasidungog ang mga top performing police stations sa probinsya sang Negros Occidental sa ginpatigayon nga Flag Raising and Awarding Ceremony sang Negros Occidental Police Provincial Office (NOCPPO) kahapon nga adlaw, Nobyembre 4, 2024.
Ang nasambit nga aktibidad ang ginhiwat sa Kanla-on Hall, Camp Alfredo M. Montelibano Sr. Barangay Estefania ciudad sang Bacolod nga ginpangunahan sang NOCPPO Provincial Director nga si PCOL Rainerio M. De Chavez.
Ang awarding ceremony ang nagpasidungog sa mga top-performing police stations nga ginkilala sa tion sang “Birada Semana” tinalikdan nga Oktubre 7-13, 2024, partikular sa pag-angkon sang pinakamataas nga numero sang operasyon sang pulis batok sa ilegal nga droga.
Sa City Police Station category ginkilala ang Silay Component City Police Station ang nakabaton sang pasidungog para sa exemplary efforts.
Samtang sa Municipal Police Station category naman ginkilala ang Binalbagan, Calatrava, Cauayan, Hinigaran, kag Ilog Municipal Police Stations sa ila notable accomplishments.
Ginpabutyag man ni PCOL De Chavez ang iya pagdayaw sa mga kapulisan sang mga nasambit nga police station sa ila dedikasyon kag mga kontribusyon sa mga operasyon sang NOCPPO batok sa droga kag ang padayun nga pagpasanyog sang kalinong kag kahusay sa komunidad.
