Kahapon nga adlaw kadungan sang pagdumdum sang 126th Negros Day ukon Cinco de Noviembre gin-donate sang pamilya ni Gen. Anecito Lacson ang ancestral house sin isa National Museum of the Philippines.
Ginpirmahan kahapon sang mga heirs ni Lacson ang Deed of Donation and Project Kickoff para sa Gen. Aniceto Lacson Ancestral House (GALAH) nga nahamtang sa Talisay City, Negros Occidental. Gintukod ang nasambit nga balay sang 1880 sang prominente nga sugar baron kag statesman sa diin isa ini sa maragtason kag key site para sa Negros Revolution.
Gindeklarar ang balay nga National Historical Landmark sang National Historical Institute ukon kilala karon nga National Historical Commission of the Philippines sadtong March 13, 2002. Bangud sang kadugayon na, nagalaom ang pamilya nga paagi sa pag-donate sini sa National Museum ma-restore ang balay kag mabalik ang former glory sini.
Sa nahibaluan nga si Gen. Lacson upod kay Gen. Juan Araneta sang Bago City, amo ang nagpanguna sa madinalag-on nga province-wide revolt batok sa mga mananakop nga Kastila sadtong November 5, 1898.
