Masobra sa P82 million ang balor sang illegal drugs ang narekober sang Police Regional Office (PRO) 6 sa kabug-usan nga bulan sang Oktubre sini nga tuig. Santo sa datos sang PRO-6, nagadangat sa 12,066 grams sang ‘shabu’ nga nagabalor sang P82 million ang ila narekober sa nakaligad nga bulan. Samtang yara naman sa 2,013 grams sang marijuana ang narekober sang Oktubre nga nagabalor sang P241,000. Yara naman sa 317 ka mga suspek ang naaresto gikan sa 246 ka mga police operations. Ang Negros Occidental Police Provincial Office (NOCPPO) amo ang may pinakamadamo nga suspek nga naaresto nga nagadangat sa 104. Ginasundan ini sang Iloilo City Police Office – 82; Bacolod City Police Office – 62; Iloilo Police Provincial Office – 45; Capiz Police Provincial Office- 9; Antique Police Provincial Office- 7 kag Aklan Police Provincial Office nga may apat. Samtang ang Guimaras Police Provincial Office kag Regional Police Drug Enforcement Unit 6 ang pareho nga may tag-duha ka mga suspek nga naaresto.
