Nadulaan sang preno ukon mechanical error ang gintunaan sang pagkahulog sang traktora sa pangpang kag gintunaan sang kamatayon sang driver sini sa Hacienda Luygoy 2 sakop sang Barangay Granada sa ciudad sang Bacolod, pasado las-6 sang aga, Nobyembre 6. Ang biktima nga nagtaliwan ang ginkilala nga si Mario Tandog, 59-anyos, kag residente sa amo nga lugar. Upod man ni Tandog nanday Rene Sawsi kag Erwin Martinez nga nagapanghakot naman sang compost ukon higko sang baka. Base sa interview sang DYHB kay Police Major Ramel Sarona, head sang Bacolod City Police Office- Traffic Management Unit, nadulaan sang preno ang traktora rason nahulog ini sa pangpang kag napilpilan si Tandog nga gintunaan sa iya kamatayon. Santang si Martinez ang luwas sa katalagman sa amo nga aksidente, si Sawsi naman ang nakaagom sang minor injuries sa iya kamot kag tiil. Kapin tatlo pa ka oras natigayon nga makuha ang lawas ni Tandog sa pagkapilpil sang traktura bangod tuman kabudlay sang sitwasyon sa lugar kag suludlon.
