Nagalaum ang Department of the Interior and Local Government (DILG) Negros Island Region (NIR) sa paglakip sang budget sang rehiyon para sa 2025 General Appropriations Act.
Ini angut sa plano nga pagpatukod sang permanente sini nga opisina sa Negros Occidental nga ipahamtang sa ciudad sang Bacolod.
Ang DILG-NIR ang ginapangunahan sang Regional Director sini nga si Lailyn Ortiz nga nagpatigayon sang courtesy visit kay Bacolod City Mayor Albee Benitez sa Bacolod City Government Center (BCGC) kaupod sanday Christian Nagaygay, director sang DILG-Bacolod, kag Assistant Regional director Teodora Sumagaysay subong nga adlaw, Nobyembre 12, 2024.
Apang sa karon bangud limitado ang pondo, padayunon sini ang pag-arkila sang espasyo sa syudad nga gina-okupar ang opisina sang DILG-Negros Occidental sa Second Floor sang East 4 Center, Burgos Extension sa Barangay Villamonte.
Dugang pa sang regional director nga ang DILG-NIR naga-operate sa administratibo, apang sa bahin sang pinansyal nga operasyon kag sistema sang pagreport ini ang yara gihapon sa idalom sang Rehiyon 6 kag 7.
