Isa ang probinsiya sang Negros Occidental sa mga awardees sang Seal of Good Local Governance (SGLG) sang Department of the Interior and Local Government (DILG). Nalakip ang Negros Occidental sa 41 ka mga kaprobinsiyahanan nga ginkilala sa maayo nga pagdul-ong sang serbisyo publiko kag dedikasyon sa local nga panghimanwa para sa tuig 2023. Samtang, SGLG awardees man ang 13 ka mga kaciudaran sa probinsiya magluwas sa ciudad sang Kabankalan. Anom ka mga banwa ang nagbaton man sang amo nga pagkilala nga ginalakipan sang EB Magalona, Hinigaran, Ilog, Isabela, La Castellana, kag Manapla. May angot sini, ginpahayag ni Provincial Administrator Atty. Rayfrando Diaz II nga ang pagbaton sang SGLG award ang nagapakita lamang nga nalab-ot sang probinsiya ang standards sang DILG sa pagpatuman sang mga programa, proyekto kag mga aktibidad.
