PROVINCIAL CAPITOL – Wala pa matumod ang kadakuon sang mabaton nga bonus sang mga empleyado sang Provincial Government sang Negros Occidental sa maabot nga Disyembre.
Ginpahayag ni Governor Eugenio Jose Lacson nga mabaton sang mga capitol employees ang tuigan nila nga mga “kaayuhan” magluwas sa Performance-based Bonus (PBB) bangud wala pa nakapaguwa sang guidelines ang Department of Budget and Management (DBM) sa pag-release sini.
Suno kay Lacson, indi ini luyag nga maliwat ang natabo sang nagliligad nga mga tinuig nga ginpabalik sang Commission on Audit (COA) ang ginbaton nga mga bonus kag insentibo sang mga empleyado sang probinsiya bangud nga wala sang basehan.
Sa madumduman nga gindeklarar sang COA nga ilegal ang paghatag sang Capitolio ang extra yearend bonuses sadtong 2015 kag 2016 kag ginmandu ang pag-uli sang kantidad. Gin-apelar ini sang probinsiya apang masami man ginabasura ang ila hingyo.
Ginpabutyag ni Lacson indi ini gusto nga madugangan ang abagahon sang mga empleyado, ilabi na sa ila nga pag-retiro.
Ginpasiguro naman sini nga may nagakaigo nga pundo ang probinsiya kag handa sila nga ihatag sang dungan ang PBB para sa pagdaog sang Negros Occidental sang Seal of Good Local Governance gikan sa Department of the Interior and Local Government sa mga tuig 2022 kag 2023 basta may yara lang sang guidelines.
