Wala pa nakilala ang pito ka mga ginapatihan rebelde nga napatay sa engkwentro sa gintingob nga pwersa sang 47th kag 15th Infantry Battalions sang Army sa Candoni, Negros Occidental, Huwebes sang kaagahon, Nobyembre 21, 2024.
Natabo ang engkwentro sa tunga sang mga ini alas 3:43 sang kaagahon samtang nagapatigayon sang combat operations ang mga tropa bilang sabat sa tip-off sang mga lokal nga pumuluyo angut sa presensya sang fully armed remnants sang South West Front (SWF), Komiteng Rehiyon-Negros, Cebu, Bohol, Siquijor (KR-NCBS), sa Barangay Gatuslao nga nagapatigayon sang extortion kag terroristic activities.
Naglawig ang nasambit nga engkwentro sang 40 minutos, nga nagresulta sa pagkamatay sang pito (7) ka mga NPA kag pagkarekober sang mga high-powered firearms, lakip ang lima (5) ka M16 rifles, duha (2) ka AK47 rifles, kag isa (1) M653 nga pusil gikan sa lugar.
Suno kay Lt. Col. Magno M. Mapalad III, Commander sang 47th Infantry Battalion nga wala naman sang may nareport nga casualty sa bahin sang gobyerno kag padayun nga gina-verify pa ang identity sang mga bangkay.
