BACOLOD CITY- Ginselebrar sang Bacolod City Local Government Unit ang National Children’s Month sa Magikland Amusement Park sa ciudad sang Silay, Sabado nga adlaw, Nobyembre 23.
Ginpangunahan ni Bacolod City Councilor Celia Flor nga Chairperson sang Committee on Women, Gender, Family, and Childcare ang amo nga aktibidad, kaupod si Department of Social Services and Development Head Alma Gustillo.
Ginatos ka mga kabataan ang nagtambong sa amo nga selebrasyon nga nagikan sa nagkalain-lain nga foundation, orphanage, day care center, kag iban pa sa ciudad. Ang pagselebrar sang Bulan sang Kabataan, ang isa ka espesyal nga okasyon kun sa diin sila ang ginapabugal kag ginahatagan importansya ang ila kaayuhan.
Ginaduso nga sila ang mahatagan sang nagakaigo nga seguridad, edukasyon, kag oportunidad para sa ila nga pag-uswag kag bwas damlag. Samtang ginpakamaayo ni Bacolod City Mayor Albee Benitez nga sila ang maka-enjoy sang “Ride All You Can” sa amo nga amusement park.
