Magapatigayon sang seperado nga imbestigasyon ang 302nd Infantry Brigade natuhoy sa pagpangluthang sa isa ka miyembro sang Philippine Army sa iya nga upod sa sulod mismo sang detachment sang 15th Infantry Battalion sa Barangay Manlucahoc, ciudad sang Sipalay, Nobyembre 25.
Ang biktima ang ginkilala nga si Corporal Arnold Sumaribos, 36-anyos, kag residente sang Iloilo City, samtang ang suspetsado amo si Staff Sergeant Charlemagne Nabejet, 43-anyos, kag residente sang Lanao Del Norte.
Sa inisyal nga imbestigasyon sang Sipalay City Police Station nahibaluan nga nag-inum inum ang biktima kag ang suspetsado bangud sila ang nagaselebrar sang kaadlawan sang isa sa ila mga kaupod.
Nagluntad ang kumusyon sa tunga duha bangud sang indi paghampanay kag hinali nalang nga ginbunot sang suspetsado ang iya nga armas kag ginluthang ang biktima.
Ginpahayag ni Brigadier General Joey Escanillas, 302nd IB Commander, indi pa masiling kun ano ang gintunaan sang pagpangluthang apang ginsiguro nga magapangatubang sang nagakaigo nga konsekwensiya ang may salabton sa amo nga insidente.
Wala naman gintolerar ni Escanillas ang amo nga hitabo kag isa ini ka ginkabig nga “isolated case”.
Ginklaro naman sang Commander nga may polisiya sa sulod sang detachment nga ginbawal ang indi maayo nga aktibidad kaangay na lamang sang pag-inom sang makahulubog nga ilimnon.
Kun mapamatud-an nga sa sulod sang detachment natabo ang pag inom-inom, may command responsibility diri ang commander.
Possible naman nga mapahalin sa serbisyo si Nabejet matapos ang pagpangluthang. Liwat naman nga ginpahanumdom ni Escanillas, nga mag-obserbar ang mga katapo sang militar sang ila nga conduct and discipline.
