Nag-untat sang byahe ang pila ka mga katapo sang traditional jeepney drivers kag operators sa Bacolod kahapon matapos nakabaton ang mga ini sang impormasyon nga may yara sang nagahatag sang “warning” kag may dakpanay nga matabo. Sa interview sang DYHB sa Bacolod Alliance for Commuters Operators and Drivers (BACOD) President Rudy Catedral iya ginpahayag nga may kahangawa ang iban sa mga miembro sini bangud wala ang mga ini nagpakigbahin kag nag-upod sa consolidation nga ginapatuman sang Land Transportation Franchising and Regulatory Board (LTFRB) angut sa Public Utility Vehicle Modernization Program ukon PUVMP. Suno kay Catedral nga indi man gusto sang pila ka mga miembro ang madakpan bangud yara sa P62,000 ang multa pananglitan madakpan nga naglapas sa violation ang mga ini. Pahayag ni Catedral nga yara sa kapin isa ka libo ang mga miembro sini ang wala sang registration, franchise kag insurance bangud wala ini nagsumiter sa panawagan sang LTFRB. Nagalaum naman si Catedral nga magapagwa sang statement ang LTO ukon ang LGU sang Bacolod pinaagi kay Bacolod City Mayor Albee Benitez nga magpadayun lang sa gihapon nga magabyahe ang mga traditional jeepneys kag wala sang dakpanay nga matabo. Madumduman nga natapos na ang deadline sang consolidation sang prangkisa sang mga jeepney tinalikdan nga Nobyembre 29,2024.
