Ginbawian sang kabuhi ang 69-anyos nga lalaki matapos mabungguan sang ambulance sa National Highway bahin sang Sitio Ubay, Barangay Caradio-an, Himamaylan City, Negros Occidental alas 5:30 sang aga, Disyembre 5, 2024.
Ginkilala ang pedestrian nga biktima nga si alyas Jose, isa ka laborer kag residente sang Barangay Talaban sang nasambit nga ciudad samtang ang driver naman sang ambulance ginkilala kay alyas Leo, 62-anyos kag residente sang Barangay Talaban sang pareha nga ciudad.
Base sa imbestigasyon nagabiyahe ang Ambulance gikan sa Barangay Buenavista, Himamaylan City padulong sa ciudad sang Bacolod apang aksidente nga nabungguan sini ang pedestrian nga gulpi lang nga nagtabok humalin sa nakatundan padulong sa sidlangan nga direksyon nga bahin sang dalan.
Bangud sini, natumba ang pedestrian nga si alyas Jose sa konkreto nga dalan, nag-angkon sang pilas sa nagkalain-lain nga bahin sang iya lawas kag gilayon nga gindala sa Gov. Valeriano M Gatuslao Memorial Hospital para sa medical treatment.
Apang samtang nagapadyun ang pagbulong sa biktima gindeklarar ini nga nagtaliwan bangud sang naangkon sini nga daku nga pilas sa iya ulo. Sa karon yara na sa kustodiya sang Himamaylan Police Station ang driver sang ambulance para sa nagakaigo nga disposisyon.
