LA CASTELLANA- Nagdangat na sa 2,460 ka mga indibidwal ukon 628 ka pamilya ang nag-evacuate nagikan sa banwa sang La Castellana matapos ang paglupok sang Bulkan Kanlaon, pasado las-3 sang hapon, Lunes, Disyembre 9.
Base sa rekord sang La Castellana Local Government Unit nagikan sa Barangay Biak na Bato, Cabagnaan, Camandag, Masulog, Mansalanao, kag Sag-ang ang amo nga mga evacuees.
Nagpahamtang sang pito ka mga evacuation center ang banwa kun sa diin ini ang La Castellana National High School, La Castellana Elementary School, Don Felix Robles Elementary School 1 kag 2, Saint Vincent High School, La Castellana National Senior High School, kag Public Plaza.
Apang padayon pa nga naga-abot ang mga nabilin nga mga pumuluyo nga apektado sa ginpatigayon nga force evacuation sa banwa.
