PROVINCIAL CAPITOL – Nagpasar sang resolusyon ang Provincial Disaster Risk Reduction and Management Council nga ipaidalom ang Negros Occidental sa state of calamity bangud sang paglupok sang Bulkan Kanlaon.
Sa ginpatigayon nga PDRRMC meeting sa Capitol Social Hall kahapon sang aga, naghatag sang report si DOST-PHIVOLCS Director Teresito Bacolcol angot sa nagluntad nga paglupok tinalikdan nga Lunes sang hapon, Disyembre 9.
Ginpresentar man ni PDRRMO Head Irene Bel Ploteña ang Rapid Damage Assessment and Needs Analysis (RDANA) gikan sa report sang nagkalain-lain nga ahensiya may angot sa mga epekto sang paglupok.
Sa sini, ginduso ni Provincial Administrator Atty. Rayfrando Diaz II ang mga criteria sa pagdeklarar sang state of calamity kag ini ang gin-ugyunan man ni OCD-6 Director Raul Fernandez nga amo man ang chairman sang Task Force Kanlaon.
Lakip sa rekomendasyon ang paggamit sang calamity fund kag pagpatuman sang price freeze. Ang resolusyon ang igapasa sa Sangguniang Panlalawigan para sa nagakaigo nga approval sa patigayunon nga special session subong nga aga.
