Ginbawian sang kabuhi ang 38-anyos nga tanod matapos ginlampusan ini sang gina-alegar telescopic shock sang motor sa Purok Estiwetes, Barangay Bagong-silang, banwa sang Don Salvador Benedicto, Disyembre 12, 2024.
Ang 38-anyos nga biktima isa ka babaye kag miembro sang Barangay Peacekeeping Action Team (BPAT) samtang ang suspetsado naman ang 38-anyos nga lalaki kag pareho nga residente sang nasambit nga lugar.
Sandig sa impormasyon, nakita nalang ang wala sang kabuhi sang isa ka babaye nga nagapaligo sa iya kaugalingon nga dugo nga may pilas sa ulo kag nagahigda sa duta.
Base naman sa imbestigasyon, naigo sang matig-a nga bagay ang biktima kag ginapatihan ini ang “motorcycle telescopic shock” nga narekober sa crime scene nga may mantsa sang dugo.
Gilayon naman nga nagpatigayon sang hot pursuit operation ang mga katapo sang Don Salvador Benedicto Municipal Police station nga nagresulta sa pagdakop sang suspetsado. Sa karon yara na kustodiya sang mga kapulisan ang suspetsado para sa nagakaigo nga disposisyon.
