Gina-alegar biktima sang salisi gang ang isa ka jewelry shop nga nahamtang sa Bacolod City Mall Mandalagan, pasado las-12 sang tungang udto, Disyembre 14.
Ginpahayag ni Police Captain Rondyl Tapang, Station Commander sang Bacolod City Police Station 3, padayon ang imbestigasyon sang kapulisan natuhoy sa amo nga insidente, apang ginabulubanta yara sa apat ka mga suspetsado ang may kahimuan sa amo nga pagpangawat.
Sa inisyal nga impormasyon nga nakuha sang kapulisan, isa lamang ka tindera ang nagabantay sa amo nga balaligyaan bangod lunch break sang isa diri sa ila.
Nahibaluan nga naga-angot ang yabi sa bulutangan sang alahas sa ila nga estante, rason nga nakuot ini sang suspetsado.
Dugang pa ni Tapang, isa sa mga suspetsado ang naga-istorya sa tindera sang ila ginhimo ang krimen.
Padayon nga gina-inventory sang balaligyaan kun pila ang balor sang mga nakawat nga alahas, kag igapaidalom man sa imbestigasyon ang tindera sang amo nga jewelry shop.
