Ginakahangawan sa karun sang mga pumuluyo malapit sa Bulkan Kanlaon ang posible nga pagluntad sang lahar flow, ilabi na sini nga mainulanon nga panahon.
Ginpahayag ni Punong Barangay Joselito Martinez Jr. sang Barangay Biak na Bato sa banwa sang La Castellana, padayon ang monitoring kag pag-aligmat sang pumuluyo bangod sa padayon nga pagtaas sang aktibidad sang Bulkan Kanlaon.
Nag-request na ang Punong Brgy. sa Local Government Unit kag sa opisina ni 5th District Congressman Dino Yulo nga kun mabuligan patigayon sang clearing operation agod malikawan nga may maanod nga debris sa pag-ilig sang lahar sa kasubaan.
Samtang may pila naman ka mga pumuluyo sang amo nga Barangay nga wala nalakip sa extended 6-kilometer danger zone nga luyag magpadulong sa evacuation center bangod sa kahangawa sa liwat nga paglupok sang bulkan.
Nagpasiguro si Martinez nga 24 oras bukas ang Barangay hall para sa mga pumuluyo sa tunga sang kalamidad kag ginahingyo sini nga kun may problema ipadangat gilayon direkta sa ila.
Madumduman sadtong Hunyo 2024 nga paglupok sang bulkan, nagluntad ang lahar flow sa bahin sang Barangay Biak na Bato.
