Plano ipakuha ni Cadiz City Mayor Salvador “Bading” Escalante ang nga tanom nga nipa nga nagabalabag sa alagyan sang tubig pagwa sa suba agud indi na maliwat pa ang natabo nga pagbaha sa pila ka mga barangay tinalikdan nga adlaw. Sa interview sang DYHB sa alkalde, ginpahayag sini nga sa bahin sang Hda. Umapog, may kapin apat ka creeks nga nahamtang diri sa diin masami man nagaawas ang tubig. Ini bangud sa unhan pagwa sa baybay, may yara sang mga tanuman nga nipa. Dugang sang alkalde, sang una, ginaubra pa ini negosyo sang mga tawo apang sang nagpigaw na ang baklanay, halos indi naman ma-harvest ang nipa kag nagtululumpok nalang. Suno kay Mayor Bading, isa ini sa mga posible rason kun ngaa naghinay ang pagwa sang tubig baha padulong sa baybay. Sa madumduman, kapin 6 ka oras nagbubo ang ulan sa Cadiz City tinalikdan nga Dominggo sang gab-i kag Lunes sang kaagahon. Ginapatihan nga tuman man ang pag-ulan sa kabukiran kag nagdaludo ang tubig padalom rason nga hinali lang nagsaka ang tubig baha.
