Natigayon na nga na file ang kaso nga homicide batok sa pulis nga nagluthang sa mag-amay nga nagresulta sa kamatayon sang bata nga 21-anyos kag pagkapilas sa 52-anyos nga amay sa Barangay Canjusa, Banwa sang Pulupandan, las-4 sang aga tinalikdan nga Disyembre 25, 2024. Ginkilala ang bata nga nagtaliwan nga si Joeman Fuentes kag ang amay naman nga pilason amo si Jomar Fuentes samtang ang pulis naman nga suspek ang ginkilala kay Police Corporal Armen Alanza, 36- anyos kag na assigned sa 604th Company Regional Mobile Force Battalion. Sa interview sang DYHB kay NOCPPO Spokesperson Police Captain Judesses Catalogo iya ginpahayag nga na-file na ang kaso nga Homicide batok kay Alanza nga tubtob karon yara pa-hospital bangud sang naangkon man sini nga pilas sa ulo kag lawas. Suno kay Catalogo nga ginakabig man nga Hospital Arrest ang suspek bangud may pila ka mga kapulisan ang naka-standby sa hospital para magbantay. Sa pihak nga bahin, natalana naman nga iga-file ang dugang nga Frustrated Homicide batok kay Alanza para sa amay nga pilason kag naluwas sa katalagman. Madumduman nga nag-ugat ang insidente sang nagbakal ang mag-amay nga biktima nga sang ilimnon sa isa ka tiangge sang natabu ang pagbinaisay kag didto gintiro sang suspek ang mga ini apang gindeklarar nga dead on arrival sa Valladolid District Hospital si Joeman. Dugang pa ni Catalogo nga sa tion nga mangin maayo ang kondisyon sang pulis kag nakabaton na sang clearance gikan sa doktor nga sarang na ini makagwa, gilayon nga iga-detain ini sa Pulupandan Police Station para sa nagakaigo nga disposisyon.
