Natalana nga magabalik na ang face to face classes sa mga eskwelahan nga wala nasulod sa 6km radius extended danger zone (EDZ) kag mga eskwelahan nga wala ginhimo nga evacuation centers sa banwa sang La Castellana matapos ang paglupok sang bulkan Kanlaon sa maabot nga Lunes, Enero 6, 2025. Ginpahayag ni La Castellana Municipal Mayor Alme Rhummyla G. Nicor Mangilimutan nga matapos ang ginpatigayon nga meeting kaupod sa Municipal Disaster Risk Reduction Management Council (MDRRMC), ila nahisugtan ang pagbalik sang face to face classes bangud suno sa alkalde nga indi mahimo nga ang mga estudyante maga-untat sa pag eskwela sa malawig nga tinion. Samtang, ginatugyan naman sang alkalde sa Department of Education kun ano nga sahi sang alternatibo nga pagtudlo kag pag-tuon ang ila mahimo agud nga mapadayon lamang ang pag-eskwela sang mga kabataan. Madumduman nga matapos ang paglupok sang bulkan tinalikdan nga Disyembre 9, 2024 gilayon nga nagmandu kag nagpagwa ang banwa sang La Castellana sang Executive Order angut sa suspension sang klase sa tanan nga eskwelahan nga sakop sang banwa.
