Mas pilion ni Office of the Civil Defense Region 6 Director Raul Fernandez nga magtiner sa gin-establisar nga tent city sa Himamaylan City ang mga pumuluyo nga apektado sang pag-alburuto sang Bulkan Kanlaon sang sa magpauli. Ang pahayag ginhimo ni Fernandez sa ginhiwat nga press briefing sa Negros Occidental Provincial Capitol, Myerkules sang aga, angot sa pagpapauli na sang kapin 4,000 ka mga evacuees nga gin-decamp matapos nahisayran nga indi sakop sang six-kilometer radius extended danger zone ang ila puluy-an. Suno kay Fernandez, nahangpan sini nga tuman na ka stressful para sa mga pumuluyo ang madugay nga pagtiner sa evacuation centers apang nagapabilin ang posibilidad nga ipasaa sa Alert Level 4 ang Kanlaon kag yara sa gihapon ang katalagman sang paglupok sang bulkan. Ginpabutyag ni Fernandez nga kun indi sa evacuation centers, mas maayo nga tent city sa Himamaylan magtiner ang mga evacuees bangud mangin bentaha pa ini sa mga camp managers, partikular sa banwa sang La Castellana, nga sadtong Hunyo pa nagsugod sa pagmentinar sang evacuation centers. Ginpabutyag sini dugang nga magamag-an ang trabaho sang mga social workers bangud magabulig na ang iban nga LGUs kag mangin ang national government indi lamang sa resources kundi subong man sa manpower.
