Isa ka negosyante ang pinakauna nga gun ban violator sa Western Visayas. Kahapon nagsugod na ang pagpatuman sang Commission on Elections (Comelec) sang nationwide gun ban may angot sa national and local elections sini nga 2025. Kahapon man Enero 12, naaresto sang Iloilo City Police Office (ICPO) ang suspek nga si Ryan Soliva, 41-anyos kag residente sang Barangay Tabuc Suba, Jaro, Iloilo City. Naaresto ang suspek matapos nga aksidente nga nabungguan sang salakyan sini ang mga nagabaligya sang bibingka sa Barangay Seminaryo, Jaro, Iloilo City. Suno sa ICPO, sang nagresponde ang kapulisan, nadiskubrehan ang duha ka 9mm pistols kag isa ka armalite rifle sa salakyan ni Soliva. Wala sang napakita nga dokumento si Soliva kag exemptions sini sa gun ban. Suno kay Police Regional Office (PRO) 6 director Brigadier General Jack Wanky, pasakaan si Soliva sang kaso nga paglapas sa Republic Act 10591 ukon Comprehensive Firearms and. Ammunition Regulation Act kag COMELEC gun ban.
