Kada tawo may ara sang iya kaugalingon nga pagpati, mangin umpluwensya man ini sang tradisyon, kultura ukon pati na sang relihiyon. Kaangay na lamang sang pagpati sang kapin 400 milyon ka mga bisita nga naganyat mag-upod sa Maha Kumbh Mela ukon Great Pitcher Festival sa India. Ginaselebrar ini sa kada 12 ka tuig sa diin, pinaagi sa ini nga kapistahan, nagalusong kag nagapahulom sa suba ang mga lokal kag turista nga deboto bangud sa pagtuo nga mahugasan sini ang ila mga sala. Sang sini lang, nagtipon ang 15 milyon ka mga deboto nga naglusong sa Triveni Sangam, nga natung-an sang suba sang Ganges kag Yamuna sa Prayagraj, India. Sa Hindu tradition, ang Sangam amo ang “confluence” sang tatlo ka mga suba ukon ang lugar sa diin ang mga ini nagatinabuay. Pagpati sang Hindu nga isa ini ka sacred kag holy place. Samtang ang Maha Kumbh Mela ukon Great Pitcher Festival naman amo ang ginakilala bilang “intangible cultural heritage of humanity” nga ginproklamar sang United Nations Educational, Scientific and Cultural Organization (UNESCO) sang 2017.
