Ginpabutyag ni Bacolod City legal officer Atty. Karol Joseph Chiu nga bawal ang pagbaton sang komisyon, kag bisan ano man nga sahi sang regalo ang mga government employees. Suno kay Chiu, ano man ang status sang isa ka empleyado wala dapat nagabaton sang komisyon ukon regalo ang isa ka government employee. Ini ang angut sa ginbuyagyag ni John Rey Sarona nga isa ka anay traffic enforcer sang ciudad nga sila ang gina-alegar nagabaton sang komisyon halin sa Metro Towing Service (MTS) sa kada may mapang-clamp kag ma-tow ang mga ini sang salakyan ukon motor. Nahibaluan nga ginpahayag ni Acting Bacolod City Mayor El Cid Familiaran nga paga-imbestigaran sini ang pahayag sang anay-traffic enforcer. Madumduman nga una-na ginpahayag ni BTAO Deputy head Jose Antinio “Jojo” Robello nga indi ini makabig iligal bangud indi man ini kwarta sang BTAO ukon iya sang ciudad. Ginpahayag sang City legal officer naga-istorya na ini kay Robello kag paga-imbitaron sini si Sarona agud mabatian man ang iya sini nga bahin. Samtang, natalana naman nga paga-imbitahan ang Metro Towing Services (MTS) agud makahatag man ini sang statement natuhoy sa nasambit nga alegasyon.
