Nagpasiguro ang Commission on Elections (COMELEC) nga hilway nga makaboto ang mga pumuluyo nahamtang sa una na gin-identify sang opisina sa idalom sang Areas of Concern (AOC). Sa interview sang DYHB kay Provincial Election Supervisor Atty. Ian Lee Ananoria, ginpahayag sini nga wala sang dapat kabalak-an ang mga botante bangud kaangay sa iban nga mga polling precincts, may mga uniformed personnel man nga magabantay sa botohay. Sa madumduman, ginpaidalom sang COMELEC sa yellow category ang mga banwa sang San Enrique kag Isabela samtang Orange Category naman ang banwa sang Cauayan, Calatrava kag ciudad sang Sipalay. Dugang pa ni Atty. Ananoria nga ang mga ginpagwa nga areas of concern ang wala pa mag finalize kag posible nga sini ukon sunod nga semana sila magapatigayon sang official declaration sang AOC. Ang lima ka mga LGU nga una na ginlista sa idalom sang AOC amo ang base man sa report sang Armed Forces of the Philippines (AFP). Apisar wala sang may narekord nga election-related incidents sa probinsya sa sulod sang pila na katuig, posible nga ang tinalikdan nga mga encounters sa tunga sang army kag rebelde amo ang nangin basehan sang ahensya sa pagtumod sang AOC. Sa karon, gina-asses na sang Provincial COMELEC ang iban pa nga mga nagakaigo nga preparasyon para sa eleksyon.
