Nagpatigayon sang tradisyonal nga New Year’s call ang Negros Occidental Police Provincial Office (NOCPPO) sa pagpanguna ni Provincial Director Police Colonel Rainerio M. De Chavez kay Negros Occidental Governor Eugenio Jose “Bong” Lacson nga ginhiwat Provincial Capitol subong nga adlaw, Enero 21, 2025. Sa nasambit nga kahiwatan, pormal nga ginpakilala sa Gobernador ang NOCPPO Command Group, Provincial Staffs, Chiefs of Police, kag Chiefs of the National Support units. Bilang kabahin sang programa, nagpresentar ang NOCPPO sang isa ka komprehensibo nga year-end report nga nagalakip sang detalyado nga pag-analisar sa peace and order status sang probinsya. Ang report nagpakita sang mga accomplishments, operational initiatives, kag security measures nga ginpatuman sang NOCPPO sa nagligad nga tuig nga naghatag sang maathag nga laragway sang sitwasyon sang krimen, estratehiya, kag sang overall safety kag security environment sa Negros Occidental. Gin-outline man sini ang mga pagpanghangkat nga gina-atubang sang pwersa sang kapulisan kag ang mga tikang nga ginhimo agud masabat ang mga ini, nga nagapasiguro nga ang probinsya nagapabilin nga luwas para sa iya mga pumuluyo. Nagpalab-ot man sang pagpasalamat si Provincial Director De Chavez kay Governor Bong sa iya wala untat nga suporta sa pwersa sang NOCPPO samtang ginhangkat naman sini ang tanan nga chief of police nga padayunon ang kampanya batok kriminalidad para sa mas luwas nga komunidad. Ginpabutyag naman Gobernador ang iya pagdayaw kag pagsalig sa mga katapo sang NOCPPO kag sa mga Police Officers nga na-assign sa tagsa ka local government unit (LGU) sa bug-os nga Negros Occidental kag ginkilala ang importante nga papel sang pwersa sang kapulisan.
