May ginalantaw nga duha ka anggulo ang pamilya sang security guard nga possible mangin motibo sa pagpangluthang sa biktima, pasado las-5 sang hapon, sa Zone 1 Barangay Handumanan sa ciudad sang Bacolod. Ang biktima ang ginkilala nga si Arnold Caballes, 37-anyos, kag residente sang Barangay Cabug. Ginpahayag ni Dolly Malalu-an, live-in partner sang biktima, las-5 sang hapon, nagpadulong si Caballes sa Bangga Totong Brgy. Felisa, agod magkuha sang duha ka tag lima ka kilo nga bugas agod ipa-utang sa ila nga tupad balay. Apang makaligad ang pila oras, ginkatingala ni Malalu-an nga wala pa nakapauli ang live-in partner, rason nga iya ini ginpangita, nahibaluan na lamang niya nga si Caballes ang ginluthang bangod sa nakuha nga impormasyon sa tupad balay. Suno kay Malalu-an sang tinalikdan nga inadlaw, may nakaaway si Caballes natuhoy sa ginbaligya nga kahoy sa nagapang-ubra furniture bangod ang wala nalakip sa nabakal nga kahoy ang gintapas. Samtang may nakaaway man ang biktima nga CAFGU bangod ini ang nagachat sa iya live-in partner bisan wala man ini ginasapak ni Malalu-an. Dugang pa ni Malalu-an, may pagka-strikto ang biktima bangod ini ang isa ka anay army nga na-assign sa 47th Infantry Battalion apang ini ang nag-AWOL bangod tuyo kuntani ini i-assign sa Mindanao. Sa karun nagalaom ang pamilya sang biktima nga mahatagan sang hustisya ang kamatayon ni Caballes.
