Nagapakatig-a pa ang pila ka mga tenants sang Manokan Country nga maghalin sa ila nga mga pwesto kag magsaylo sa ginpaubra nga temporary stalls sang SM sa tabok lang sang ila baligyaan. Madumduman nga tinalikdan nga tuig pa ginapasaylo ang mga tenants agud masugdan naman ang redevelopment sang manokan country. Kag sang damlag lang, nagmando na si Mayor Albee nga dayunon ang demolition sa Enero 28,2025 bangud madamo naman sang pabor nga nahatag ang ciudad para sa mga tenants Sa interview sang DYHB sa anay presidente sang mga tenants sang Manokan Country nga si David Montoya, ginpahayag sini nga tuman na ka subol sang tiyempo para makapanghimos sila sang ila mga gamit kag magsaylo sa relocation area sa sunod nga lima ka adlaw. Dugang pa sini nga maga-ayo sila sa ciudad nga kun mahimo, madungan nalang sila sa pagpahalin man sa mga pumuluyo sang Barangay 12 sa Pebrero 28. Suno pa kay Montoya, kagamay sang ila salayluhan malapit sa parking area sang SM sa diin duha ka lamesa lang ang makaigo. Amo kun ngaa dapat ipatuman man sang ciudad ang una sini nga ginpasalig nga i-extend sa dalan ang ila mga lamesa agud makakaon man sang maayo ang ila mga customers.
