Ginapa-imbentaryo sa karon sang Office of the Civil Defense ang mga units sa Yolanda Housing Projects sa northern Negros Occidental bilang pagpanghanda pananglitan magtaas ang alerto sang Bulkan Kanlaon.
Ginpahayag ni OCD-6 Director kag Task Force Kanlaon Commander Raul Fernandez nga kahapon, Enero 23, nakigsapol sila sa mga local government units sa norte nga bahin sang probinsiya kun sa diin may yara sang mga housing projects ang National Housing Authority.
Ginapa-imbentaryo ang mga housing units nga wala pa na-award kag wala pa naistaran agud possible pahamtangan sang mga pumuluyo nga maapektuhan sang massive evacuation kun magsaka sa Alert Level 4 ang Kanlaon.
Ini nga mga LGUs ginalakipan sang Silay City, EB Magalona, Victorias City, Manapla, Cadiz City, Sagay City, kag Escalante City kun sa diin may Yolanda Housing Projects samtang ginakonsiderar man ang Bacolod City, nga may regional evacuation center.
Suno kay Director Fernandez, ginalantaw man ang pagsulod sa memorandum of agreement sang Bago City kag Talisay City para sa pareho nga katuyuan.
Sa pihak sini, aminado ang OCD regional director nga kulang sa gihapon ang naga-eksister nga housing units kun magtaas ang alerto sang Kanlaon.
