Nagapanindugan ang ciudad sang Bacolod nga indi subol ang ila desisyon nga dayunon ang pag-demolish sang Manokan Country sini nga Enero 28,2025.
Sa interview sang DYHB kay Committee Chair on Markets, Councilor Celia Flor, ginpahayag sini nga tuman na ang ila nahatag nga oras kag tyansa sa mga tenants para magsaylo sa relocation area sini sa parking area sang SM.
Suno kay Flor, indi matawag nga subol ang pagpahalin sa mga tenants kun isa ka tuig na sila ginapaayunan sang ciudad.
Kun sa pag intiende lang sang ciudad sa ila ang paga-istoryahan, makapila ka beses na sila ginpa-ayo, ugaling lang, may limitasyon man ang tanan.
Dugang pa sang konsehal nga may kapin 10 pa ka mga tenants nga wala naka amat-amay bayad sang ila mga arrears.
Kun mag amo sini, suno kay Flor, mabudlayan ang mga ini nga mapasaylo sa relocation area bangud ang ila pagahatagan sang prayoridad amo ang nagatinguha makabayad sang arkila sa ciudad bisan gingamay lang.
