Nagnubo sang 25% ang kaso sang road accidents sa probinsya sang Negros Occidental para sa tuig sang 2024 base sa report sang Negros Occidental Police Provincial Office. Base sa report, 906 ka insidente ang narekord sang nagligad nga tuig kumparar sa 1,216 ka mga insidente sang 2023. Suno kay NOCPPO Provincial Director PCOL Rainerio De Chavez, nahimo ini bangud sa ginpabaskog nga pagpatuman sang mga kasuguan kag mga ordinansa sa trapiko subong man sang information operation on road safety. Suno pa sa datos nga ang mga vehicular incidents resulting in physical injuries ang nagnubo sang 29%, halin sa 517 sang 2023 kag 366 lamang sang 2024. Samtang, nagnubo naman sang 28% ang mga incidents resulting in damage to properties nga may 393 lamang sang 2024 kumparar sa 552 ka insidente sang nagligad nga tuig. Sa pihak nga bahin, ang Bacolod City Police Office naman ang nakarekord sang 23.53% nga pagtaas sang road accidents sang 2024. Base sa datos sang BCPO, 357 ka mga insidente ang ginreport sang nagligad nga tuig kag ini ang mas mataas sang 68 halin sa 289 sang 2023. Padayun naman nga nagapanugyan ang NOCPPO kag BCPO sa mga driver sang mga nagkalain-lain nga mga salakyan nga magsunod sa mga pagsulundan sa dalanon.
