Wala pa makapauli ukon ginkabig nga missing ang pila ka mga abyan sang babayi nga gina-alegar gin abuct sang tinalikdan nga Enero 22 sa Purok Riverside Barangay Banago sa ciudad sang Bacolod. Ang missing ang ginkilala nga si Kent Mojica, 20-anyos, kag residente sang Barangay 16 sa amo nga ciudad. Sa eksklusibo nga pahayag ni Shanny Mae Mojica sa DYHB, iloy ni Kent, ulihi nga nakita ang iya subang nga bata pasado las-3 sang kaagahon, Enero 22 sa isa ka billiaran nga nahamtang sa bahin sang 20th Lacson Street, apang wala na nakita kun diin ini gilayon nagpadulong. Nahibaluan nga tumalagsahon lang nagapauli si Kent sa Brgy. 16 bangod ini ang naga-istar kun kaisa sa Brgy. 2, Brgy. Banago, kag Brgy. Estefania. Suno sa iloy, under probation si Kent matapos nga na-imbolbar sang illegal nga droga kag ginhunong s Social Development Center sang 17-anyos ang edad sini kag ginhilway sang Oktubre tuig 2024. Samtang, ginpa-blotter sang tiya ni Kent nga si Ma. Cristina Herrera, sa Police Station 2 nga ini ang wala makapauli sa ila puluy-an pila na ka adlaw. Ginpahayag ni Herrera, magluwas kay Kent, missing man ang abyan sini nga si Elmo Lopez sang Brgy. Cabug. Gina-alegar sang tiya nga kilala ukon upod sang gina-alegar gin abduct nga babayi sa Brgy. Banago si Kent, kilala man sang mga ini ang nadakpan sa drug buybust operation sang tinalikdan nga Enero 23 sa 6th Street, Barangay 7, las-12:47 sang kaagahon. Ang gin-aresto sa amo nga operation amo nanday Jaypee Yasas, 20 anyos, residente sang Purok Sigay, Barangay 2 kag Edgar Loraña, 29-anyos, kag residente naman sang Purok Magtiayon Barangay 10. Ginapatihan sang pamilya ni Kent nga possible may kaangtanan sa illegal nga droga ang pagkadula sini, apang luyag nila mahibaluan kun ano na ang kahimtangan sini. Apang ginklaro na sang Police Station 3 nga wala sang abduction nga may nagluntad sa Brgy. Banago kag ang amo nga babayi ang nakapauli na sa ila nga puluy-an.
