Nagapatigayon sang ila regular nga paglibot sa dalanon sang Bacolod City ang Anti-Mendicancy Task Force sang ciudad. Nahibaluan nga na-aktuhan sang mga katapo sang Task Force gab-i sang Enero 28 ang pila ka mga kabataan nga nagapangayo-kayo sa dalan Ramos kag nagapang-edaron 4 tubtob 13 anyos. Ginpahayag ni Social Welfare Officer II kag task force focal person Anjanette Servano, ginadokumento sang Department of Social Services and Development (DSSD) ang ngalan sang mga kabataan, naga-coordinate sa barangay kag nagapatigayon sang dayalogo sa mga ginikanan sini. Ginapatuman man sang DSSD ang City Ordinance 146 nga naga-regulate sang mendicancy sa ciudad, nagadagdag sang penalidad kag pondo para sa amo nga programa. Samtang, ginpat-od naman ni DSSD head Dr. Richelle Verdeprado-Mangga nga ang mga bata nga wala pa katungtong sang walo ka tuig nga nagapakalimos ang ipahamtang sa pag-atipan sang DSSD, temporary shelter ukon sa isa ka lisensyado nga ahensya. Liwat man nga nagpahanumdom ang DSSD nga indi dapat maghatag sang kwarta sa mga nagapangalimos.
