Under probation pa ang duha ka mga kalalakinhan nga narekord nga missing sa ciudad sang Bacolod sumugod sang Enero 22, 2025, suno sa mga kapulisan.
Ang mga missing ang ginkilala nanday Kent Mojica sang Barangay 16, kag Elmo Lopez sang Barangay Cabug, nga pareho naga-edad sang 20 anyos.
Ginpahayag ni Police Major Eugene Tolentino, Station Commander sang Bacolod Police Station 2, ginparekord sang himata ni Mojica nga siya ang ulihi nakita sa billiaran nga nahamtang sa bahin sang 20th Lacson St.
May mga impormasyon man nga nagikan kay Jaypee Yasas kag Edgar Loraña, suspetsado sa drug buy bust operation nga ginpatigayon sa Brgy. 7 kag nakuhaan sang ₱544,000 nga balor sang ginapatihan shabu sang Enero 23, ila ginsiling nga si Mojica kag Lopez ang nagsugid sa awtoridad natuhoy sa ila transaksyon rason nga sila ang nadakpan, amo nga ginkaligban sang kapulisan ang amo nga impormasyon bangod sa alegasyon nga sila nga apat ang maga meet-up kuntani.
Nahibaluan nga may nagbisita pa nga himata sa police station agod magdul-ong sang pagkaon sa mga missing person bangod ila gina-alegar nga ini ang nagkaladakpan sa ginpatigayon nga buy bust operation, apang base sa rekord sang kapulisan wala sila sang may nadakpan nga Mojica kag Lopez.
Samtang suno naman kay Police Captain Andy Ofalia, Station Commander sang Police Station 9, ulihi nga nakita si Lopez nga nagbiya sa ila puluy-an sa Brgy. Cabug agod magpadulong kuntani sa downtown area apang wala na ini nakapauli balik.
Sa karun padayon ang imbestigasyon sang mga kapulisan natuhoy sa pagkadula sa amo nga mga persona.
