Kapin sa katunga sang mga Pilipino ang nangin kontento sa performance ni Vice President Sara Duterte ukon 53% base sa RMN Networks – Oculum Research and Analytics Fourth Quarter Nationwide Survey.
Nagagwa sa ginpatigayon nga survey nga si Duterte ang nagapakita sang aktibo nga pag-engage sa mga inisyatibo sang publiko.
Nagasunod sa iya si Senate President Francis Escudero nga may 46% nga approval rating kag ika-tatlo si President Ferdinand Marcos Jr. nga may 38% nga moderate level of satisfaction.
Yara naman sa 25% nga approval rating ang nakuha ni House Speaker Ferdinand Martin Romualdez samtang si Chief Justice Alexander Gesmundo naman ang nakakuha sang 19% sa public perception.
Ang commissioned survey sang RMN Networks ginpatigayon tinalikdan nga Disyembre 16 tubtob Disyembre 22, 2024 sang Oculum Research kag Analytics sa tunga sang 1,200 ka mga respondents sa bug-os nga pungsod.
Samtang, sa bahin naman sang dissatisfaction ranking nanguna si President Ferdinand Marcos Jr. nga may 31% nga nagapakita sang nagkalain-lain nga pagbaton sa iya administrasyon ilabi na sa bahin sang kontrobersyal nga mga polisiya.
Si Speaker Romualdez ang yara na sa ikaduha nga pwesto kun sa diin nagalab-ot sa 25% sang mga Pilipino ang indi kontento sa iya liderato sa Kamara.
Nakakuha naman sang 19% dissatisfaction rate si Chief Justice Alexander Gesmundo kag Vice President Sara Duterte samtang Si Senate President Escudero ang nakakuha lamang sang 11% nga dissatisfaction rate.
