Liwat nga nabatian ang booming sound nagikan sa Bulkan Kanlaon kadungan sang pag-alburuto sini, las 3:11 sang hapon, adlaw sang Huwebes, Pebrero 6.
Ginpahayag ni Mari-Andylene Quintia, resident volcanologist sa PHIVOLCS Kanlaon Volcano Observatory, namonitor ang minor explosive eruption pinaagi sa seismic signal, sound signal, kag mga report sang pumuluyo nagikan sa banwa sang La Castellana kag La Carlota City.
Nabatian ang lupok sang bulkan sa bahin sang Brgy. Sag-ang sa La Castellana, kag Brgy. Yubo sa ciudad sang La Carlota.
Wala makita sang camera sang PHILVOCS ang paglupok sang bulkan bangod sa malain nga panahon sa lugar sang nagluntad ang insidente.
Suno kay Quintia, nareport sa ila talatapan nga naka-eksperyensiya sang ash fall ang pila ka mga residente malapit sa bulkan.
Kun ipaanggid sang Disyembre 9, 2024, mas mabaskog ang paglupok sang bulkan sadto komparar subong.
Indi pa matumod sang PHILVOCS kun may nagluntad nga pyroclastic density currents.
Dugang pa ni Quintia, ginapangabay ang publiko nga magsusok sang facemask, kag magpabilin sa sulod sang balay agod malikaw sa masakit tuga sang pag-alburuto sang Bulkan Kanlaon.
