Nagapaandam ang Philippine Volcanology and Seismology (Phivolcs) sa mga pumuluyo malapit sa bulkan Kanlaon nga posible ini liwat nga maglupok.
Sa interview sang DYHB kay Phivolcs Director, Teresito Bacolcol, ginpahayag sini nga dako ang posibilidad nga matabo liwat ang minor explosive eruption sa bulkan, kaangay sang narekord kahapon, Pebrero 6.
Dugang pa sini nga kun gamay lang nga paglupok, wala ini sang dako nga kahalitan magluwas nalang sa ashfall kag lahar flow.
Karon nga mainulanon ang panahon, ginapaandaman sang Phivolcs ang mga magapuyo malapit sa mga suba nga nakaangot sa bulkan nga maghalong sa mabaskog nga pagdaludo sang tubig nga may samo nga abo halin sa ginbuga ni Mt. Kanlaon.
Suno kay Bacolcol, ginadumilian sa gihapon ang pagbalik sang pila ka mga residente sa sulod sang 6 km danger zone, bangud pwede liwat maglupok ang bulkan, ano man nga oras.
Ang nasambit nga eruption kahapon ang nagbuga sang 600 meters nga kataason sang abo, tuman nga mas gamay sa narekord sang ulihi sini nga paglupok sang Disyembre 9 sa diin nagatakos sang 4,000 meters ang ginbuga sini nga abo.
Sa karon, nagapabilin sa gihapon sa Alert Level 3 ukon magmatic unrest ang bulkan Kanlaon.
