Temporaryo anay nga ginpauntat sang La Castellana LGU ang pagpang-harvest sang pila ka mga mangunguma sa pila ka mga barangay sang banwa bangud sang aktibidad sang bulkan.
Sa interview sang DYHB kay Mayor Rhumyla Nicor-Mangilimutan, ginpahayag sini nga pila ka ektarya pa ang wala napang ubos pang-harvest bangud sang paglupok sang bulkan kahapon.
Ini amo ang mga pananom sa Barangay Lalagsan, Talaptap kag Camandag proper.
Ginpaathag sang Alkalde nga nagabalik lang ang ini nga mga mangunguma sa ila duta sa sulod sang danger zone sa oras nga ila gintalana agud magpadayon lang ang ila palangabuhian apang pagkatapos sini, ginapabalik lang sila sa evacuation centers.
Samtang, apektado sang lahar flow kag ash fall kahapon amo ang barangay Sag-ang kag Guinpanaan river.
Sa pihak nga bahin, nakahanda na ang banwa pananglit magpadayon ang aktibidad sang bulkan. May mga naka-standby na nga mga rescue vehicles sa mga sitio nga una na naapektuhan sang ashfall.
May mga oxygen tank naman nga ginpabutang sa health center para magamit sa mga hapu-on.
Pagklaro ni Mayor Mhai nga yara pa sa gihapon sa sulod sang evacuation centers ang masobra 4,000 nga mga residente sang Barangay Masulog, Biak na Bato, Cabagnaan, Mansalanao, kag upper Sag-ang nga ginpang-evacuate tinalikdan pa nga bulan sang paglupok sang bulkan sang Disyembre 9, 2024.
Ini amo ang mga residente nga nagapuyo sa 6km extended permanent danger zone.
