Gina-alegar biktima ang isa ka call center agent sang robbery hold up sang mga suspetsado nga riding in tandem sa Purok Ilang-ilang, Barangay 38 sa ciudad sang Bacolod, pasado las-12 sang tungang kaagahon, adlaw sang Biyernes, Pebrero 7.
Ang biktima ang ginkilala nga si alias ‘Ruby’, 32-anyos, kag temporaryo nga residente sa amo nga lugar.
Base sa ginparekord sang biktima sa Bacolod City Police Station 1, samtang nagahulat ini sang masakyan sa bahin sang Hernaez Street, nagpundo sa atubang ni Ruby ang wala makilal-an nga lalaki nga nagamaneho sang motorsiklo angkas ang isa ka babayi.
Suno sa alegasyon ni Ruby, gintayaan ini siya sang suspetsado sang wala matumod nga armas luthang kag ginsilingan nga ihatag ang iya nga bag.
Natigayon nga makuha sang mga suspetsado sa biktima ang iya mga ID’s, ATM, cellphone nga nagabalor ₱10,000.
Nagpalagyo gilayon ang mga suspetsado matapos ang krimen.
Ginlaragway ni Ruby nga nagasuksok sang gray jacket, short, kag full face helmet ang driver kag ang angkas naman ang nagasuksok sang itom nga jacket, nagakalo, kag maong pants.
