Handum sang mga bata ang makalagaw gid sa mga zoo para makita ang wild animals may yara man sang gusto makabisita sa dalagko nga aquariums para personal makita ang mga sea creatures nga masami lang nila malantaw sa tv. Isa ka video ang nag-viral sa social media sa diin makita nga halos kaunon sang isa ka dako nga isda ang isa ka mermaid performer. Ini ang natabo sa Mekong Underwater World sa Yunnan, China. Indi bag-uhan sa trabaho ang isa ka Chinese sa diin halos adlaw-adlaw nagalangoy ini upod sa mga isda para sa ginapatigayon nga live shows suksuk ang iya kataw nga costume. Isa ka beses samtang naga perform ang isa ka 22-anyos nga babayi sa sulod sang aquarium samtang nagalantaw ang mga bisita, hinali lang ginsakmal sang sturgeon ang ulo sini. Maayo lang kay gilayon ini nakagwa halin sa baba sang isda. Apang wala diri natapos ang istorya bangud nga nakaagum man sang kritisismo ang management sang aquarium matapos nga ginaalegar ginatabunan kag ginapanginwala sang mga ini ang natabo sa performer. Apisar ginpauntat gid man ang show pagkatapos sadto. Ginaalegar nga nag-offer sang $100 nga compensation ang kumpanya sa performer para sa “moral damages” agud maghipos lang sa natabo nga insidente. Ang nasambit nga video ang nakuha sang isa sa mga bisita kag gin post ini sa facebook. Suno sa mga animal experts ang nasambit nga giant fish ang wala sang unto kag wala masami nagapang atake tawo. Sa pihak nga bahin, isa ka picture man ang ginpost sang biktima sa diin makita ang lagub sa parte sang nawong sini kag liog.
